కుటుంబ కలహాలతో గచ్చిబౌలిలో మహిళ ఆత్మహత్య!
సైబరాబాద్ – విశాల భారతి
కుటుంబ కలహాల కారణంగా మనస్థాపానికి గురై ఓ వివాహిత అపార్ట్మెంట్పై నుంచి దూకి ఆత్మహత్యకు పాల్పడిన విషాద ఘటన గచ్చిబౌలి పోలీస్ స్టేషన్ పరిధిలో చోటుచేసుకుంది. పోలీసులు తెలిపిన వివరాల ప్రకారం…బీహార్ రాష్ట్రానికి చెందిన అరుణ (37)కు తొమ్మిదేళ్ల క్రితం అన్మోల్ కుమార్తో వివాహమైంది. అన్మోల్ కుమార్ ఆర్కిటెక్ట్గా పనిచేస్తుండగా, అరుణ గృహిణి. గత ఏడేళ్లుగా ఈ దంపతులు తమ కుమార్తెతో కలిసి మసీద్బండలోని ‘అపర్ణ సేరెన్’ (శరన్ గ్రేటర్ కమిటీ) అపార్ట్మెంట్లో నివాసముంటున్నారు. అయితే, వీరి ఆరేళ్ల కుమార్తె ఆటిజం (మానసిక వికలాంగత్వ సమస్య)తో బాధపడుతోంది.కూతురి అనారోగ్య సమస్యల విషయమై గత కొంతకాలంగా భార్యాభర్తల మధ్య తరచూ గొడవలు జరుగుతున్నాయి. ఈ క్రమంలో తీవ్ర మనస్థాపానికి గురైన అరుణ, శనివారం తెల్లవారుజామున తాను ఉంటున్న అపార్ట్మెంట్ 12వ అంతస్తు నుంచి కిందకు దూకేసింది. తీవ్ర గాయాలవ్వడంతో ఆమె అక్కడికక్కడే ప్రాణాలు కోల్పోయింది.సమాచారం అందుకున్న గచ్చిబౌలి పోలీసులు వెంటనే సంఘటనా స్థలానికి చేరుకుని పరిశీలించారు. మృతదేహాన్ని పోస్టుమార్టం నిమిత్తం ఉస్మానియా ఆసుపత్రికి తరలించారు. మృతురాలి తమ్ముడు ఇచ్చిన ఫిర్యాదు మేరకు గచ్చిబౌలి పోలీసులు కేసు నమోదు చేసుకుని, దర్యాప్తు జరుపుతున్నారు.
