-చేవెళ్ల-గచ్చిబౌలికి బస్సు సర్వీస్ ప్రారంభం..
-రోజుకు ఎన్ని ట్రిప్పులంటే..
శేరిలింగంపల్లి: విశాలభారతి: హైదరాబాద్ నగరంలో చాలా మంది ఆర్టీసీ బస్సుల్లో ప్రయాణించేందుకే ఇష్టపడతారు. పైగా ఇప్పుడు అధికారంలో ఉన్న కాంగ్రెస్ పార్టీ.. ఆర్టీసీ బస్సుల్లో మహిళలకు ఉచిత ప్రయాణం కల్పిస్తుండటంతో..బస్సుల్లో రద్దీ విపరీతంగా పెరిగింది. అలానే నగరం చుట్టుపక్కల కొత్త కాలనీలు ఏర్పాటు అవుతున్నాయి. ఆర్టీసీ అధికారులు అక్కడికి కూడా బస్సు సర్వీసులు నడుపుతున్నారు. దీంతో పాటు రద్దీ ఎక్కువగా ఉండే ప్రాంతాల్లో బస్సుల సంఖ్యను పెంచుతున్నారు. కొత్త రూట్లకు బస్సులను ఏర్పాటు చేస్తున్నారు. ఈక్రమంలో తాజాగా గ్రేటర్ ఆర్టీసీ అధికారులు కీలక నిర్ణయం తీసుకున్నారు. చేవెళ్ల నుంచి గచ్చిబౌలి వరకు బస్సు సర్వీస్ను ప్రారంభించారు. దీని వల్ల ఐటీ ఉద్యోగులు, ఈ ప్రాంత ప్రజలకు భారీ ఊరట లభించనుంది.గచ్చిబౌలి ప్రాంతం ఐటీ కంపెనీలకు నిలయంగా మారింది. నగరంలోని నలు మూలల నుంచి నిత్యం వేల మంది గచ్చిబౌలికి ప్రయాణం చేస్తుంటారు. అయితే కొన్ని రూట్ల నుంచి ఇక్కడకు బస్సు సర్వీసు లేదు.మరీ ముఖ్యంగా చేవెళ్ల, మొయినాబాద్ ప్రాంతాల నుంచి వందల మంది గచ్చిబౌలి ఏరియాలోని పలు సాఫ్ట్వేర్ ఆఫీసులు, ఇతర కార్యాలయాల్లో పని చేస్తున్నారు. అయితే చేవెళ్ల, మొయనాబాద్ ఏరియాల నుంచి గచ్చిబౌలికి నేరుగా బస్సులు లేవు. చేవెళ్ల నుంచి గచ్చిబౌలి రావాలంటే.. అప్పా జంక్షన్ వరకు వెళ్లి.. ఆ తర్వాత అక్కడ నుంచి క్యాబ్ బుక్ చేసుకోని వెళ్లాల్సిన పరిస్థితి.గచ్చిబౌలి వరకు బస్సు ఏర్పాటు చేయాల్సిందిగా ఎప్పటి నుంచో కోరుతున్నారు. వీరి ఇబ్బందులను గమనించిన ఆర్టీసీ యాజమాన్యం.. బస్సు ఏర్పాటు చేయడానికి ముందుకు వచ్చింది. ఆర్టీసీ సిటీ రీజినల్ మేనేజర్ సుధా పరిమళ ఆదేశాల ప్రకారం.. శుక్రవారం మెహిదీపట్నం డిపో మేనేజర్.. గచ్చిబౌలి ప్రాంతానికి డీలక్స్ బస్ సర్వీస్ ప్రారంభించారు. 593/316 నంబర్ బస్సు.. ఈ చేవెళ్ల నుంచి.. మొయినాబాద్, అప్పా జంక్షన్, నార్సింగి కూడలి మీదుగా.. ఓఆర్ఆర్ సర్వీస్ రోడ్డులో ప్రయాణిస్తూ గచ్చిబౌలి చేరుకుంటుంది.దీంతో ప్రయాణికులు అప్పా జంక్షన్ దగ్గర దిగి క్యాబ్, ఆటోల మీద ఆధారపడాల్సిన అవసరం లేదు. నేరుగా గచ్చిబౌలిలో దిగిపోవచ్చు. అయితే ఈ బస్సు కేవలం రెండు ట్రిప్పులు మాత్రమే తిరుగుతుంది. ఉదయం, సాయంత్రం వేళల్లో చెరో ట్రిప్పు తిరుగుతుంది. గచ్చిబౌలి వరకు బస్సు ఏర్పాటు చేయడంపై ఉద్యోగులు, ఈ ప్రాంత ప్రజలు హర్షం వ్యక్తం చేస్తున్నారు. ఆర్టీసీ సిబ్బందికి ధన్యవాదాలు తెలుపుతున్నారు.
