రైల్వే స్టేషన్ వద్ద కత్తితో బెదిరించి మొబైల్ దోపిడీ
– ఇద్దరు సీరియల్ నేరస్తుల అరెస్ట్
– చందానగర్ పోలీసులు ఛేదించిన కేసు
– దోచుకున్న మొబైల్తో పాటు ఐదు వాహనాల స్వాధీనం
– పలు జిల్లాల్లో 11 తాజా కేసులు వెలుగులోకి
సైబరాబాద్ – విశాల భారతి చందానగర్ రైల్వే స్టేషన్ సమీపంలోని హుడా కాలనీలో ఉన్న ఓ గుడిసె వద్ద కత్తితో బెదిరించి మైనర్ బాలుడి నుంచి మొబైల్ ఫోన్ దోచుకున్న ఇద్దరు సీరియల్ నేరస్తులను చందానగర్ పోలీసులు అరెస్ట్ చేశారు. నిందితుల నుంచి దోపిడీకి గురైన రెడ్మీ నోట్ 11 ప్రో మొబైల్ ఫోన్తో పాటు ఐదు దొంగిలించిన వాహనాలను స్వాధీనం చేసుకున్నారు. విచారణలో సైబరాబాద్, హైదరాబాద్, యాదాద్రి-భువనగిరి జిల్లాల్లో నమోదైన మరో 11 ఆస్తి నేరాల్లోనూ తమ ప్రమేయాన్ని నిందితులు అంగీకరించినట్లు పోలీసులు తెలిపారు.
పోలీసులు తెలిపిన వివరాల ప్రకారం.. జూలై 22వ తేదీ రాత్రి సుమారు 11.30 గంటల సమయంలో ఉజార్ల విష్ణువర్ధన్ (21), దండుగుల భాను ప్రసాద్ (25) చందానగర్ రైల్వే స్టేషన్ సమీపంలోని గుడిసెలో ఒంటరిగా ఉన్న 16 ఏళ్ల జాన్ సయ్యద్ అనే బాలుడి వద్దకు తాగేందుకు నీరు కావాలని చెప్పి వెళ్లారు. సమీపంలో మద్యం సేవించిన అనంతరం తిరిగి అక్కడికి చేరుకుని కత్తితో బెదిరించారు. బాలుడు ప్రతిఘటించడంతో దాడి చేసి అతని వద్ద ఉన్న రెడ్మీ నోట్ 11 ప్రో మొబైల్ ఫోన్ను లాక్కొని పరారయ్యారు.
బాధితుడి ఫిర్యాదు మేరకు జూలై 23వ తేదీ తెల్లవారుజామున 3.30 గంటలకు చందానగర్ పోలీస్ స్టేషన్లో క్రైమ్ నంబర్ 795/2026గా భారతీయ న్యాయ సంహిత (బీఎన్ఎస్) సెక్షన్ 309(6) కింద కేసు నమోదు చేసి దర్యాప్తు ప్రారంభించారు. ఘటనాస్థలం పరిసర ప్రాంతాల్లోని సీసీటీవీ దృశ్యాలను సేకరించి పరిశీలించగా నిందితులను గుర్తించారు. విశ్వసనీయ సమాచారం ఆధారంగా జూలై 27వ తేదీ ఉదయం 6 గంటలకు పాపిరెడ్డి కాలనీలోని రెండో నిందితుడి నివాసం వద్ద ఇద్దరినీ అదుపులోకి తీసుకున్నారు.
విచారణలో నిందితులు చందానగర్ కేసుతో పాటు మంగళహాట్, కేపీహెచ్బీ, రాయదుర్గం, భువనగిరి టౌన్, యాదగిరిగుట్ట, కూకట్పల్లి పోలీస్ స్టేషన్ల పరిధిలో నమోదైన మొత్తం 11 తాజా ఆస్తి నేరాల్లో తమ ప్రమేయాన్ని అంగీకరించినట్లు పోలీసులు వెల్లడించారు.
నిందితుల వద్ద నుంచి ప్రస్తుత కేసుకు సంబంధించిన ఒక రెడ్మీ నోట్ 11 ప్రో మొబైల్ ఫోన్తో పాటు బజాజ్ పల్సర్ 220, బజాజ్ పల్సర్ 150, బజాజ్ పల్సర్ ఎన్ఎస్ 160, కేటీఎం డ్యూక్ 200, యమహా ఫాసినో వాహనాలను స్వాధీనం చేసుకున్నారు.
పోలీసుల వివరాల ప్రకారం మొదటి నిందితుడు ఉజార్ల విష్ణువర్ధన్పై గతంలో హైదరాబాద్, సైబరాబాద్ పరిధిలో చోరీలు, దోపిడీలు, దోపిడీతో గాయపరచడం, అత్యాచారం, పోక్సో వంటి తీవ్ర నేరాలకు సంబంధించిన 11కు పైగా కేసులు నమోదై ఉన్నాయి. రెండో నిందితుడు దండుగుల భాను ప్రసాద్పై కూడా మేడిపల్లి, కొల్లూరు, కుషాయిగూడ, గాంధీనగర్ తదితర పోలీస్ స్టేషన్ల పరిధిలో చోరీలు, దోపిడీలు, ఎన్డీపీఎస్ చట్టం కింద నమోదైన కేసులు సహా 13కు పైగా కేసులు ఉన్నట్లు వెల్లడైంది.
ఈ కేసును ఇన్స్పెక్టర్ ఎ. శ్రీధర్ కుమార్, సబ్ ఇన్స్పెక్టర్ కె. శ్రీనివాస తేజా, చందానగర్ డిటెక్టివ్ క్రైమ్ సిబ్బంది, ఆర్సీ పురం డివిజన్ అసిస్టెంట్ కమిషనర్ ఆఫ్ పోలీస్ చి. వై. శ్రీనివాస్ కుమార్ పర్యవేక్షణలో ఛేదించారు. నిందితులను అరెస్ట్ చేయడంలో విశేష కృషి చేసిన పోలీసు బృందాన్ని ఉన్నతాధికారులు అభినందిస్తూ తగిన బహుమతులు అందజేయనున్నట్లు తెలిపారు.
