నకిలీ వీసాలతో మస్కట్కు
– శంషాబాద్లో 20 మంది మహిళలు అరెస్టు
– మానవ అక్రమ రవాణా కోణంలో దర్యాప్తు
– ఏజెంట్ల ముఠా కోసం పోలీసుల గాలింపు
సైబరాబాద్ – విశాల భారతి
నకిలీ వీసాలతో విదేశాలకు వెళ్లేందుకు యత్నించిన భారీ ముఠా గుట్టు శంషాబాద్ రాజీవ్ గాంధీ అంతర్జాతీయ విమానాశ్రయంలో రట్టయింది. మస్కట్ వెళ్లేందుకు వచ్చిన 20 మంది మహిళలను ఇమ్మిగ్రేషన్ అధికారులు అదుపులోకి తీసుకుని పోలీసులకు అప్పగించారు. ఒక్కసారిగా ఇంతమంది మహిళలు నకిలీ వీసాలతో పట్టుబడటం విమానాశ్రయ వర్గాల్లో కలకలం రేపింది.బుధవారం ఉదయం మస్కట్ వెళ్లే విమానం ఎక్కేందుకు 20 మంది మహిళలు గుంపుగా ఇమ్మిగ్రేషన్ కౌంటర్ వద్దకు వచ్చారు. వారి ప్రయాణ పత్రాలను పరిశీలించిన అధికారులకు వీసాలపై అనుమానం వచ్చింది. సాంకేతిక పరిజ్ఞానంతో వీసాలను క్షుణ్ణంగా పరిశీలించగా అవన్నీ నకిలీవని తేలింది. వీసాలపై ఉన్న ముద్రలు, భద్రతా అంశాలు, జారీ చేసిన తేదీలు అన్నీ కల్పితమని గుర్తించారు. వెంటనే అప్రమత్తమైన అధికారులు 20 మందిని ప్రత్యేక గదిలో ఉంచి విమానాశ్రయ పోలీసులకు సమాచారం ఇచ్చారు.
ఏజెంట్ల వలలో…
ప్రాథమిక విచారణలో సంచలన విషయాలు వెలుగులోకి వచ్చాయి. పట్టుబడిన మహిళల్లో ఎక్కువ మంది తెలంగాణ, ఆంధ్రప్రదేశ్లోని వివిధ జిల్లాలతో పాటు మహారాష్ట్ర, కర్ణాటక ప్రాంతాలకు చెందినవారు ఉన్నారు. మస్కట్లో ఇళ్ల పనులు, ఇతర ఉద్యోగాలు ఇప్పిస్తామని చెప్పి ఒక్కొక్కరి వద్ద రెండు నుంచి మూడు లక్షల రూపాయలు వసూలు చేసినట్లు తెలిసింది. హైదరాబాద్, ముంబయికి చెందిన ఏజెంట్లు నకిలీ వీసాలు సృష్టించి వీరికి అందజేసినట్లు పోలీసులు అనుమానిస్తున్నారు.కేవలం ఉద్యోగాల ఆశ చూపి పంపుతున్నారా లేక మానవ అక్రమ రవాణా ముఠాతో సంబంధం ఉందా అనే కోణంలో పోలీసులు లోతుగా దర్యాప్తు చేస్తున్నారు. గతంలోనూ ఇదే తరహాలో మస్కట్, దుబాయ్, కువైట్ వంటి గల్ఫ్ దేశాలకు మహిళలను తరలించి అక్కడ ఇబ్బందులకు గురి చేసిన ఘటనలు ఉన్నాయి. ఈ మహిళలను ఎవరికి అప్పగించాలని అనుకున్నారు, మస్కట్లో ఎవరు వీరిని రిసీవ్ చేసుకోవాల్సి ఉంది అనే వివరాలను పోలీసులు రాబడుతున్నారు.
పోలీసులు దర్యాప్తు…
విమానాశ్రయ పోలీసులు కేసు నమోదు చేసి 20 మంది మహిళలను విచారిస్తున్నారు. వీరి వద్ద నుంచి నకిలీ వీసాలు, విమాన టికెట్లు, ఇతర పత్రాలు స్వాధీనం చేసుకున్నారు. వీరికి వీసాలు ఇచ్చిన ఏజెంట్ల వివరాలు, ఫోన్ నంబర్లు సేకరించి ప్రత్యేక బృందాలతో గాలిస్తున్నారు. ఈ ముఠా వెనుక అంతర్జాతీయ నెట్వర్క్ ఉండే అవకాశం ఉందని అనుమానిస్తున్నారు. కేంద్ర నిఘా సంస్థలకు కూడా సమాచారం అందించినట్లు తెలిసింది.
